लघुकथा

मान्छेको खोजी

-श्रीधर शर्मा

       सडकको बीचमा दुई पागल एक-अर्कालाई देखेर खूब हाँसे र दुवै मन्दिरतर्फ लागे । मन्दिरलाई हेरेर दुवैजना फेरि मजासँग हाँसे, अनि दुवै मस्जिदतर्फ बढे । त्यहाँ पुगी दुवैजना पहिले मुसुक्क हाँसे अनि दुवैले निधार खुम्च्याए । त्यसपछि चर्च भएतिर उनीहरूले पाइला बढाए । चर्चको अवलोकन गरी केही बेरसम्म चूपचाप बसे अनि धुरुधुरु रोए । रुँदै-रुँदै उनीहरू सिंहदरबार गेटसम्म पुगे अनि झगडा गर्न थाले । झगडा समाप्त भएपछि एउटा पागलले अर्को पागललाई सोध्यो- भाइ !  तिमी कसलाई खोजिरहेका छौ ? दोस्रोले जवाफ दियो- 'म ईश्वरलाई खोजिरहेको छु ।' दोस्रोले पहिलोलाई सोध्यो- 'होइन, तिमी चैँ कसलाई खोज्दैछौ ?' दोस्रोले भन्यो । अलि नजिक आऊ, कसैले सुन्ला । दुबै नजिक भए तब उसले कानमा सुटुक्क भन्यो- 'भाइ ! म मान्छेलाई खोजिरहेको छु ।' फेरि दुवैजना पेट मिचिमिची हाँस्न थाले ..... ।

इटहरी