 |
Web Hosting by Netfirms | Free Domain Names by Netfirms |
|
|
|
|
गजल 1 विपुल लुइँटेल ब्यूँझिएर आधा रातमा करायौ कि कसो ? एक्लो रातको शून्यतामा डरायौ कि कसो ?
अल्मलिँदा चारैतिर बाटो नपाएर मानिसको भीडभित्रै हरायौ कि कसो ?
हात समाई सँगै हिँड्ने साथी नरोजेर एक्लै हिँड्दा बाटो कतै बिरायौ कि कसो ?
घोडा चढाई बादलपारि जून छुन लाने सपनाको राजकुमार ठहर्यायौ कि कसो ?
सयजोडी तिमीलाई हेर्ने नयनहरूबाट एक जोडी मेरै पो मनपरायौ कि कसो ?
गजल 2
भित्री मन यो वैलेको छ गुलाफ यहाँ फुलेर के ? मनको बाग छ उजाड-उजाड कोइली यहाँ डुलेर के ?
कुहिरो छ मडारिँदो छातीभित्र तुफानमा झरीपछि बादल फाटी आकाश यहाँ खुलेर के ?
रित्याएर नयन सधैँ आगो मनको निभाउँछु झुटो मुस्कान सधैँभरि ओठमा यहाँ खोलेर के ?
बाँधिएन शरीरभित्र टाढा भयो हृदय नै घाम र पानी इन्द्रेणीको रङमा यहाँ घुलेर के
दर्द बोकी यादहरू झुल्किरहन्छन् स्मृतिमा मदिराको प्यालाभरि एकपल यहाँ भुलेर के ?
|
